Verið að smala fyrir rúninginn - Gullbrá fremst á myndinni með nýfæddu lömbin, aftan við hana er Súperbotna með hvítt lamb

 

Eftir rúninginn veittum við því eftirtekt að Súperbotna, sem er veturgömul var ennþá lafmóð og mjög slöpp. Við tókum hana því upp í hlöðu til að fylgjast með henni og drapst hún seinna um daginn, hún var auðsjáanlega veik og hafið ekki þolað smölunina. Lambið hennar var líka slappt og fórum við með það niður á Botna þar sem Nína tók að sér að gefa því með heimaalningunum sem þau eru með. Eftir pensilínkúr hresstist lambið og er nú orðið sprækt.

Seinnipartinn renndu krakkarnir og Holla í ána og viti menn það komu 5 á land ágætis fiskar. Nonni rúllaði fyrir Guðlaug á Lækjarbotnum rúmum 40 rúllum á laugardag og rúmum 60 rúllum á sunnudag.

Krakkarnir fóru svo í bæinn á sunnudagsmorguninn og var Holla í rólegheitum í tiltekt og snatti. Við renndum í bæinn á mánudagskvöldi með viðkomu í Votumýri með bleikju fyrir Kollu og Gunna.

Á þriðjudagsmorguninn vaknaði Holla eldsnemma og keyrði krakkana út á Keflavíkurvöll, en þau voru á leið til Ungverjalands í heimsókn til foreldra Árna þeirra Sissu og Gissurar og ætla að vera þar í mánuð. Seinnipartinn var rennt aftur í sveitina með viðkomu á Laugarvatni í Fontana og eftir eftirlitstúr hjá Nonna renndum við fyrir vatnið og komum við í Efsta-Dal hjá Björgu náfrænku Hollu og Bjössa en þau hjón reka ferðaþjónustu, hestaleigu, eru í hrossarækt og reka með kúabú. Það var mjög gaman að skoða hjá þeim, allt svo snyrtilegt alveg til fyrirmyndar.

 

Við skoðuðum myndarlegan tveggja vetra Kráksson sem hjónin í Efsta-Dal eiga, klárinn er fremst á myndinni og Efsti-Dalur er í baksýn

 

Restin af vikunni fór í snatt og snúninga og gera heyvinnslutækin klár fyrir heyskapinn. Á föstudaginn fórum við aftur í bæinn þar sem Nonni þurfti að mæta á fund um morguninn og eftir hádegi renndum við austur aftur með viðkomu í Nátthaga í Ölfusi og keyptum okkur perutré svona sem smá tilraun og rautt og hvítt rifs. Perutréð er yrki sem heitir Pyrus Aune (perutré Aune) sem er finnskt hérðasyrki sem vex á svæðum 1-4 í Finnlandi. Það er sagt gefa miðlungsstóra, bragðgóða, gulgræna og ávala peru með slóroða. Þægilegt sætt bragð og nýtist sem borðaldin og í matvinnslu. Tréð er snemmbært og sjálffrjótt og þroskast í september. Rifsið er yrki sem heitir "Jonkheer van Tetz" og á að gefa gómsæt ber.

Við komum svo líka við í Holtsmúla 4 hjá Gesti og Guffu og kíktum á sökkulinn undir nýja húsið sem þau voru að slá upp.

Fanney og Sverrir komu um helgina í smá heimsókn og hjálpuðu þau Hollu við að gróðursetja perutréð og rifsið og þær mæðgur hjálpuðust líka að þegar Guðlaugur kom og örmerkti Púmbu hennar Stínu sem er undan Bibbu og Kóral og svo var trippunum sleppt í hagann.