Við vorum frekar seint á ferðinni á föstudeginum og ákváðum að prófa nýja veitingastaðinn í Hellubíói á Hellu, skrýtinn matseðill en ágætur matur og nokkuð kósí staður. Holla var extra ánægð með þjónustuna en þjónninn bauðst til að taka prjónana hennar á meðan hún borðaði svo dampurinn félli nú ekki niður en hún var að hamast við að klára nokkra hestasokka og hestavettlinga upp í pöntun.

Við keyrðum svo framhjá Gumma við Hjallanes þar sem hann var að rúlla fyrir Eið, hann var þá búinn að rúlla í Helli og samtals voru það 180 rúllur.

Hann rúllaði svo um 50 rúllum á Vellinum á Vindási og þar með er heyskap lokið á Vindási. Sem betur fer náði hann að klára án þess að vélin bilaði því að Eiður á eftir að heyja í Nefsholti. Grasið í Vellinum er fínlegt og tiltölulega lítið sprottið sem hentar einstaklega illa í rúlluvélina okkar en belgkeðjan hefur slitnað nánast árlega þegar rúllan hættir að snúast í belgnum og keðjan rífur utan af henni og dregur tuggurnar með sér og á endanu er allt fast. Við reyndar tókum keðjuna í gegn í fyrra og skiptum um flestar legur og réttum stangirnar sem vonandi er að skila sér núna.