14. apríl 2013

posted Apr 14, 2013, 3:43 PM by Jón Pétursson
Um síðustu helgi byrjuðum við á föstudagskvöldinu að úrbeina og pakka einu nauti með Vindásbændum. Á laugardeginum  hellulagði Nonni meira í skemmunni, setti upp millivegg og hillur fyrir vinnuaðstöðuna en Holla lá í flensu.

 
Það er að koma mynd á vinnuaðstöðuna í skemmunni

Guðrún, Árni og Rakel kíktu austur á laugardeginum og Árni skrapp og hjálpaði Nonna í skemmunni á sunnudeginum, Rakel og Guðrún bökuðu súkkulaðiköku og pönnukökur með kaffinu og Holla prjónaði peysur

Tvær renndar hestapeysur að hætti Hollu

Um þessa helgi bólusettum við allt féð við bráðapest, ásamt Braga, Möggu og Gumma, það gekk eins og í sögu enda samhentur hópur. Um kaffileitið á laugardeginum kíktum við í Þjóðólfshaga til Sigga Sig og tókum við með okkur sérlega hrossaræktarráðunauta okkar Jónínu og Guðlaug á Lækjarbotnum. Siggi sýndi okkur merina eftir kaffisopa og spjall, hún er heilmikið að bæta sig komin með meiri ferð á töltinu og brokkið að styrkjast mikið - smellið hér til að sjá video af Þrumu og Sigga. 
Siggi sýndi okkur líka 5v graðhest undan Kjarna - svaka fótaburður! Hann sýndi okkur líka gullfalleg folöld m.a. undan snillingunum Loka frá Selfossi og Kjarna og Magna frá Þjóðólfshaga.

 
Þruma og Siggi

Rúsínan í pylsuendanum var Deutz sem hann lét gera upp frá grunni en hann var fyrsti traktorinn sem keyptur var í Fosshóla og þar að auki fyrsti Deutzinn sem kom til landsins að sögn Sigga - snilldar flottur.


Deutzinn úr Fosshólum - takið eftir timburskúffunni sem er aftan í honum

Á sunnudeginum var hífandi rok og öskuský yfir öllu - ógeð...

Ekki sést til fjalla í norðri fyrir ösku

Nonni hélt áfram með aðstöðuna í skemmunni setti lamir á hurðirnar og fl og Holla prjónaði en veðrið var svo leiðinlegt að við renndum snemma í bæinn sem gaf Hollu færi á góðum tíma í hesthúsinu og Nonni dundaði í Willys

Comments