Föstudagurinn var strembinn hjá Nonna og stóra Dýrinu, þeir voru ásamt Guðlaugi og Sigga að keyra inní gömlu fjóshlöðuna hrauni og vikri - nú á að gera reiðhöll á Botnum! Frúin var í þrifum á sumarbústaðnum á meðan.

 

 

Þegar fór að kvölda lægði alveg þannig að frúin skellti sér einn hring á hestbaki en Abel, Garpur og Lúkas höfðu fengið að fljóta með okkur austur yfir páskana og fengu að gista í hesthúsinu hjá Helgu og Valla í Flagveltu.

 

Á laugardaginn fórum við á mikla stóðhestaveislu í Rangárhöllinni ásamt Jónínu, Guðlaugi; Þórunni frá Botnum og tengdasyninum Sigga - frúin fór með penna meðferðis því nú átti ekki að klikka á að merkja við þann eina rétta. Hestarnir runnu í gegn hver öðrum flottari, þegar sýningin var búin var blaðið vel út krotað og ansi margir á óskalistanum - greinilegt að við eigum ekki nóg af merum!

Þeir sem okkur fannst bera af voru  Vilmundur frá Feti með glæsilegan afkvæmahóp, Þröstur frá Hvammi, Hnokki frá Fellskoti, Glymur  frá Innri-Skeljabrekku - þvílíkir hæfileikar og flottur litur - og einn sem vert er að skoða í sumar er Ketill frá Kvistum, á von á að hann fái góðar einkunnir.  Stæll frá Miðkoti var sýndur með afkvæmum og fannst okkur Spói frá Hrólfsstaðahelli bera af í þeirri sýningu.

 

Alltaf kemur pínu vor með fyrstu lömbunum

 

Ekki var almennt mikið veður til útreiða um páskana - bölvað norðan rok - þannig að inniaðstaðan hjá Helgu og Valla í Flagveltu kom sér vel. 

Holla á Garpi frá Sauðárkróki í reiðhöllinni í Flagbjarnarholti

 

Sunnudagurinn fór nú að mestu í slökun fyrir utan að við sóttum litla Dýrið niður á Botna en hann var í sléttun á nýja gólfinu í reiðhöllinni ásamt Nonna á laugardagskvöldinu. 

Heimilisfólkið á Botnum var önnum kafið við að taka folöldin undan hryssunum þegar við komum.

 

Holla, Nína, Billi, Siggi og Þórunn með Heklu gömlu

 

Um kvöldið var okkur boðið í páskamat á Vindás a la Gummi - reyktur lax og risarækja í forrétt lambalæri með öllu í aðalrétt og ís í desert, nammi namm.

 

 

 

Dagurinn í dag byrjaði snemma, Eiður kom um 9 í morgun og járnaði klárana.  Veðrið var með besta móti þannig að frúin skellit sér á skeifnasprett á Lúkasi að því loknu á meðan Nonni fór á stóra Dýrinu niður að á og mokaði möl upp ásamt Braga bónda, síðan hífði hann nokkra bagga frá í fyrra út fyrir rúllustæðuna sem fara svo í útiganginn.

 

Okkur fannst fríið líða heldur hratt og vorum frekar súr þegar við rúlluðum í bæinn undir kvöld...